Pages

Thursday, May 17, 2012

... करार झाले

तुझे नि माझे नको तेवढे करार झाले
बुडलो आपण, नाते अन् सावकार झाले

इतकी अडचण झाली प्रेमापायी त्यांची
कितीक होकारही शेवटी नकार झाले!

तुला नकोसा आहे हे माहीत असुनही
खुळ्या मनाशी हवेहवेसे विचार झाले

करून झाले मनासारखे हरेक वेळी
वरवर नंतर फक्त खुलासे चिकार झाले

वेडा झालो तिच्याचसाठी, तिला समजले!
तिचे बहाणे हळूहळू मग हुशार झाले

बरेच झाले, मजला केवळ दु:ख मिळाले!
तिच्या बिचार्‍या सुखात वाटे हजार झाले

हिशेब माझ्या शब्दांचा एवढाच आला -
रूतले, चुकले अन् काही आरपार झाले

जगण्याला आयुष्यभराची कैद! तरी ते -
बघता बघता श्वासांसोबत पसार झाले

नचिकेत जोशी (११/५/२०१२)

2 comments:

रणजित पराडकर said...

क्या बात!!
अप्रतिम गझल!

प्रियांका विकास उज्वला फडणीस said...

Best "Gazal" I have ever read!
my most favorite :)