काय करावे उर्जेचे

काय करावे उर्जेचे या समजत नाही
जोडत नाही ही काही वा तोडत नाही

क्षणाक्षणाला धांदल उडते जगता जगता
कधी श्वासही सोडुन देतो घेता घेता
गेली घटिका कोणासाठी थांबत नाही

उत्तर देते चकवा कायम वाटेवरती
प्रश्नच कोरून घेतो मग तळहातावरती
वळसे पडती, तरी शोध हा संपत नाही

लाभो उर्जा झर्‍यासारखी खळखळणारी
मुक्त सचेतन झोत होउनी सळसळणारी
प्राण बनुन ही श्वासांमध्ये अखंड वाही

जगतो आहे तोवर राहो सोबत माझ्या
ओळख माझी बनुनी येवो सोबत माझ्या
नसेन तेव्हा अर्थ तिलाही नसेल काही

नचिकेत जोशी (४/४/२०१३)